نصائح اليوم من عند السيدة فاطمة من مراكش

نصائح اليوم من عند السيدة فاطمة من مراكش

1-بقع الزربية ( مثل الشاي و القهوة) تنظف بماء غازي ثم تنشف بالسيشوار

2-بقع الشاي نفزكوها بخليط مكون من مقادير متساوية من الكحول و الخل الابيض و نخليوها مرقدة شوية ثم تنظف عادي بالمسحوق

3-الموكيت و الزربية خصوصا البلدية منين يكونو جداد ما نشطبوهمش بالسبيراتور في الاشهر الاولى ناخدو غير كراطة او شيتة عادية و نلبسوها ليبة موس و نشطبو بها في اتجاه الصوف و منين يقدامو شوية عاد نديرو ليهم السبيراتور

4-للمحافظة على الزربية من الرطوبة ما نفرشوهاش مباشرة فوق الارض نفرشو حصيرة ديال البلاستيك فوق الارض عاد نحطو عليها الزربية
5-الغلاية (الكافيتيرا) باش نزولو منها الكالكير نعمروها بمقادير متساوية من الماء و الخل العادي و نديرو الخليط يغلي ثم نطفيو عليه و نخليوها ليلة كاملة و في الغذ كتزول القشور ديال الكالكير كلها
6-اللوحات اللي كنعلقو في الحائط باش ما يميلوش لليمين او اليسار و يبقاو مقادين كناخدو السكوتش و نلويها مرة او 2 مرات على الخيط اللي كتعلق منه اللوحة ثم نعلقوها
7-باش عنق القميجة (الكول) يخرج نظيف قبل التصبين ندهنوه بشوية شامبوان و نحكوه شوية بشيتة اسنان ثم نديروه في المكينة

8-للمعان الملابس الجلدية بعدما نصبنوهم نرقدوهم في الماء دافي + ملعقة زيت زيتون و نخليوهم حتى يبرد الماء ثم نديروهم في علاقة بلا ما نعصروهم و نخليوهم ينشفو في الظل بعيدا عن الشمس
9-باش اواني الزجاج و الكريستال يخرجو كيلمعو منين ننظفوهم نديرو 1 لتر ماء سخون + ربع لتر خل في اناء و نرقدو فيه الاواني ثم نحطوهم مقلوبين فوق قطعة ثوب و نخليوهم ينشفو بلا ما نمسحوهم ثم نرقدو اواني اخرى في نفس الماء حتى نكملو الاواني اللي عندنا كيوليو كيلمعو بحالا جداد